නීතිය යනු පාලකයාගෙ කැමැත්තය.මිනිමරුවන් හොරුන් මංකොල්ලකාරයන් පාලකයාගෙ සෘජු නියෝග මත නිදහස ලබන නමුත් පාලකයා විවේචනය කරන මිනිසුන් හිරේ දැමීම හො බල්ලකු සේ මරා දමන බවට තර්ජනය කීරීම පාලකයාගෙ අනතරු ඇගවීම වී ඇත.

දෙවන ලෝත යුද්ධයෙන් පසුව ඇමරිකා එක්සත් ජනපදයේ විශේෂ මැදිහත්වීමකින් හරිත විප්ලවයට අනුව ලෝකයේ වැඩිවන ජනගහනය සදහා ආහාර සුලබ කිරීම අරමුණු කරගනිමින්  ඉඩම් ඒකකයකින් උපරිම අස්වැන්නක් ලබා ගැනීමේ අරමුණින් රසායනික පොහොර හා පළිබෝධනාශක භාවිතා කරමින් යාන්ත්‍රීකරණය කරන ප්‍රතිපත්ති සම්පාදනය කරමින් කෘෂිකර්මය කාර්මීකරණයට අවශ්‍ය තාක්ෂණය හා යෙදවුම් මහා පරිමාණයෙන් නිෂ්පාදනය කරනු ලැබීය 

සෑම මිනිසෙකුටම ගෞරවණීය මරණයක් හිමිවීමේ අයිතියක් ඇත. එකී අයිතිය වෙනුවෙන් ඉන්දීය අධිකරණය පසුගිය දා ලබා දුන් අතිවිශිෂ්ඨ තීන්දුවට මානව සංහතියම හිස නමා අචාර කල යුතුය.

කෝවිඩ් මෘත දේහ ආදාහනය සම්බන්ධව ලෝක සෞඛ්‍ය සංවිධානය විසින් දැනට නිකුත් කර පවතින සහ ලෝකයේ රටවල් 184 ක් පමණ දැනට අනුගමනය කරන මාර්ගෝපදේශ ද ඉන්දීය සෞඛ්‍ය දෙපාර්තමේන්තුව විසින් ලබා දී ඇති මාර්ගෝපදේශ ද අනුව මෘත දේහ ආදාහනය සහ භූමිදානය යන ක්‍රමවේද දෙකටම අවසර ලබා දෙමින් කල්කටා මහාධිකරණය විසින් මෙම අතිවිශිෂ්ඨ තීන්දුව පසුගිය දා ලබා දෙනු ලැබීය.

ගෝඨාභය රාජපක්ෂ පාලනයේ මුරබල්ලන් විසින් යාපනය විශ්වවිද්‍යාල සිසුන් විසින් ඉදි කළ ස්මාරකය, 'මළවුවන්ගේ ස්මාරකය' වනසා දමා ඇත. තිස් වසරක යුද්ධයෙන් මිය ගිය සිය ආදරණීයයන් වෙනුවෙන් ඔවුන්ට කනගාටු වීමේ, වේදනාව ප්‍රකාශ කිරීමේ හා ඔවුන් පිළිගත් මතය හා ගෙන ගිය අරගලයේ වීරත්වය ස්මරණය කිරීමේ අයිතියක් ඇත.

පසුගිය දා මහර බන්ධනාගාරයේ රැදවියන් වෙත දියත් වූ ප්‍රහාරය හා ඝාතනය  වත්මන් පාලක බලාධිකාරයේ ඉදිරි ගමන තවදුරටත් සලකුණු කරන්නකි.මෑත රාවය වෙත මා ලියූ ලිපියක තේමාව වූයේ ඒකාධිපති ගමනේ නව සුපරීක්ෂණ යාන්ත්‍රණ පිළිබදවයි.එහිදී ඩ්‍රෝන රෙජිමේන්තුවක් පිහිටුවීම, සෝදිසි කිරීමේ නව අන්තර් ජාල යෙදුමක් (App) හදුන්වා දීම ඇතුළු ජනතාවගේ පුද්ගලික හා සමාජයීය පරිමණ්ඩලය සිය අණසකට ගැනීමේ යාන්ත්‍රණයන් ගැන පැහැදිළි කළෙමි.දැන් බන්ධනාගාර රැදවියන්ගේ ඉතාම සාධාරණ ඉල්ලීම් මත සැලසුම් ගත ප්‍රහාරයක් දියත් කර තිබෙයි. එම රැදවියන් සිය විරෝධතාවයන් යොමු කරනු ලැබුවේ කොවිඩ් ව්‍යාප්තියෙන් සිය වාසය අනතුරට පත් වී තිබීම ,අධිකරණ ඉදිරිපත් කිරීම් දීර්ඝව කල් යාම හා බන්ධනාගාර නිලධාරීන්ගේ සැලසුම් ගත  ජාවාරම් නිසා සිය මූලික ආහාර අවශ්‍යතාවන් සීමා කිරීම් වලට ලක් කිරීම ආදී පීඩාවන් ට එරෙහිවයි. වත්මන් ආණ්ඩුව ප්‍රමුඛ නිලධර තන්ත්‍රය හා මිලිටරිය ඊට ප්‍රතිචාර දක්වා ඇති ආකාරය ප්‍රජාතන්ත්‍රවාදයට ලැදි දකුණේ ජන කොටස් වලට දැන් හොදින්ම පැහැදිළි වෙමින් තිබෙයි.වත්මන් පාලක-බලාධිකාරය සිය මර්දන මෙහෙයුම ක්‍රමයෙන් දියත් කිරීම අරඹා තිබෙන්නේ යාන්ත්‍රික-තාක්ෂණික උපක්‍රම හරහා පමණක් නොව ශාරීරික හිංසනයන් හා ඝාතනයන්ගේ සුපුරුදු මාදිළියත් සමගම බව මෙම සිදුවීම විසින් සාක්ෂි දරා තිබෙයි. කොවිඩ් ප්‍රශ්නය නිසා ආණ්ඩුවේ සැලසුම් යම් ව්‍යාකූලත්වයකට පත් ව තිබෙන බවක් පෙනුණ ද පසුගිය ජනාධිපතිවරණය පසුබිමේ සිටම පෙන්නුම් කළ ඒකාධිපති-අධිකාරිවාදී පාලන ක්‍රමයක් අභ්‍යාස කිරීමේ නැඹුරුව වත්මන් පාලනය විසින් කිසිසේත්ම හකුළා ගෙන නැත .කොවිඩ් දෙවෙනි රැල්ල විසින් සිදුකර ඇත්තේ එම ඒකාධිපති-මර්දන යාන්ත්‍රණයේ නව ඛණ්ඩාංක සලකුණු කරලීමකි.මර්දනය පැන නැගීමේ නව කොන්දේසි නිර්මාණය කරලීමකි.සරල බසකින් කිවහොත් 'පොලිස්-මිලිටරි රාජ්‍යයක' යම් සේයාවක් පාලක-බලාධිකාරය විසින් පෙන්නුම් කරමින් තිබෙනවා යැයි කිවහැකිය. පොලිස් දෙපාර්තමේන්තුව ද ඇතුළත් වන 'මහජන ආරක්ෂක අමාත්‍යාංශය' නම් වූ නව අමාත්‍යාංශයක් පිහිටුවමින් එහි නව ඇමතිවරයා ලෙස මිලිටරි-සිවිල් නිලධාරියකු හා ජනාධිපතිවරයාගේ සමීපතම සහචරයකු වන රියල් අද්මිරාල් සරත් වීරසේකර මහතාව පත් කිරීම එම 'ජාතික ආරක්ෂක රාජ්‍යයක්' ගොඩනැගීමේ අරමුණ පිළිබද එක් සුවිශේෂී පණිවුඩයකි.මත්ද්‍රව්‍ය හා පාතාලය මර්දනය කිරීමේ ජනප්‍රිය අවශ්‍යතාවය ඉදිරියට දමමින් ග්‍රාමීය මට්ටමෙන් ආරක්ෂක කමිටු ජාලයක් නිර්මාණය කිරීම සිය ඉක්මන් අරමුණ බව සරත් වීරසේකර අමාත්‍යවාරයා කිහිප තැනකදී අවධාරණය කර තිබිණි.අමාත්‍යවරයා වැනි මිලිටරි නිලධාරීන්ට 'ප්‍රජාතන්ත්‍රවාදය' පිළිබදව ඇති නිශේධනීය කුප්‍රකට ආකල්පය ඉතාම පැහැදිළි වන නිසාම මෙවැනි තනතුරු පත්කිරීම් වල අරමුණ වන්නේ හුදු මත්දව්‍ය වැටලීම් පමණක් නොවන බව අමුතුවෙන් කිව යුතු නැත.

 

ඒ අතරම වත්මන් පාලක හවුල බලයට පත්කිරීම සදහා සිය අනුමැතිය පළකල දකුණේ බහුතර ජනතාවගෙන් යම් සැලකිය යුතු කොටසකගේ අප්‍රසාදය මේ වනවිට මතුවෙමින් ඇති බව ද නිරීක්ෂණය කළ හැකිය.මෙම ආණ්ඩුව බලයට පත් වූයේ ජනතා- ජනප්‍රිය නිමේෂයකට තීරණාත්මක දේශපාලන ආමන්ත්‍රණයක් කිරීමට සමත් වීම තුළිනි. එම ජනතා-ජනප්‍රිය මොහොත නිර්මාණය කෙරුණේ 2015 යහපාලන සම්මුතිය විසිනි. හරියටම කිවහොත් 'ප්‍රජාතන්ත්‍රවාදය' පිළිබද පොරොන්දු පත්‍රයක් ඉදිරිපත් කරමින් 'යහපාලන හවුලක්' බලයට පත් වුවද සැබවින්ම සිදුවූයේ 'ප්‍රජාතන්ත්‍රවාදයේ' මූලික කුළුණු දෙක කඩා බිදදැමීමකි. මෙතනදී අප මතක තබා ගත යුත්තේ 'ප්‍රජාතන්ත්‍රවාදය' යනු 'ලිබරල්වාදයේ' පර්‍යාය පදයක් නොවන බවය. පසුගිය යහපාලන ආණ්ඩු සමය තුළ ඇතැම් ලිබරල් නියෝජනයන් ට ඉතාම සීමිත අර්ථයකින් යම් ඉඩක් තිබුණු බව මා ප්‍රතික්ෂේප කරන්නේ නැත.එහෙත් එය 'ප්‍රජාතන්ත්‍රවාදය දිනාගැනීමක්' ලෙස වරදවා වටහා ගත යුතු නැත.ප්‍රජාතන්ත්‍රවාදයේ මූලික කුළුණු දෙක වන්නේ මහජන ස්වාධිපත්‍යය හා ආර්ථික ප්‍රජාතන්ත්‍රවාදයයි.එහෙත් යහපාලන බල හවුල පදනම් වූයේ නව ලිබරල් සම්මුතිය මතය. යහපාලනය නමින් සිදුවූයේ නව ලිබරල්වාදී ආර්ථික-දේශපාලන දැක්මක් සහිත සම්ප්‍රදායික ප්‍රභූ ධනේෂ්වරයේ ශේෂ කණ්ඩායම සිය පන්ති බලය යළි උරගා බැලීමකි. එහි ප්‍රතිඵලය වූයේ ආර්ථිකයේ ජනතාවාදී ප්‍රතිපත්තීන් බැහැර කරදැමීම හා ජනතා පරමාධිපත්‍යය ඉතාම සීඝ්‍රයෙන් 'වෙළද ගණුදෙනු දේශපාලනයක්' බවට ඌනනය කිරීමයි.ප්‍රජාතන්ත්‍රවාදය ගැන කුමන බයිලාවන් කීවද පසුගිය නව ලිබරල් යහපාලනය තුළ සැබවින්ම කඩවැටුණේ ඉහත කී ප්‍රජාතන්ත්‍රවාදයේ මූලික කුළුණු දෙකයි.අප්‍රේල් 21 පාස්කු ප්‍රහාරය විසින් මෙම ප්‍රජාතන්ත්‍රවාදයේ කඩාවැටීම සන්දිස්ථානයක් ලෙසම තහවුරු කරනු ලැබීය. ජනතාවගේ ජීවිත ආරක්ෂා කළ නොහැකි සමස්ත ජනතා නියෝජනයම බරපතල අප්‍රසාදයකට ලක් කෙරුණු එම සිදුවීම නිසා දැවැන්ත අභියෝගයකට ලක් කෙරුණේ ජනතා පරමාධිපත්‍යය නම් වූ ප්‍රජාතන්ත්‍රවාදී සම්මුතියයි. ආණ්ඩුව තුළ පැවති පාර්ශව දෙකෙහි ආතතික ගැටුම ද මීට එක් වූ කළ 'යහපාලන බල තන්ත්‍රය' කෙරෙහි බරපතළ ජනතා අතෘප්තියක් දකුණු ලංකාව තුළ නිර්මාණය විය. 'ජනතා-ජනප්‍රියවාදී මොහොත' යනු මෙම ජනතා අතෘප්තිය දේශපාලනිකව ආයෝජනය කිරීමේ විවෘත විභවයක් නිර්මාණය වීමේ අවස්ථාවයි. ගෝඨාභාය රාජපක්ෂ නම් වූ 'නව පොරොන්දුවක මිනිසා' කරළියට එන්නේ මෙම ජනතා-ජනප්‍රියවාදී මොහොතට කළ කඩාවැදීමක් ලෙසය.

 

එමනිසා පසුගිය ජනාධිපතිවරණ සන්දර්භය තුළ ඔහු අත පැවතියේ ඊට සාපේක්ෂ වූ න්‍යාය පත්‍රයකි. වියත්මග වැනි ව්‍යාපෘති හරහා ඉහළ ආර්ථික ආයෝජන මූලික කරගෙන පහළ සමාජ ස්ථර කරා එහි ප්‍රතිලාභ ව්‍යාප්ත කිරීමේ මාදිලියක් ප්‍රචාරය කරනු ලැබීය. සිය මිලිටරි සංකේතයත් ආයෝජනය කරමින් ජාතික ආරක්ෂාව තහවුරු කෙරෙන ශක්තිමත් සිවිල්-මිලිටරි නිලධර තන්ත්‍රයක් ස්ථාපිත කිරීම ගැන ප්‍රචාරය කරන ලදී. සිංහල-බෞද්ධ වාර්ගික ජාතිකවාදී දෘෂ්ටිමය බලඇණිය හරහා සුළු ජාතීන්ගේ අන්තවාදය පරාජය කර සම්ප්‍රදායික සිංහල බෞද්ධ රාජ්‍ය බලයක් පිහිටුවීමේ සහතිකය ලබා දෙන ලදී. ජනාධිපතිවරණ ජයග්‍රහණය පමණක් නොව ඉන් අනතුරුව තුනෙක් දෙකෙහි බලයක් ලබා ගැනීමේ සාර්ථක ගමන් මග වැටී තිබුණේ මෙම ව්‍යාපෘතික-ප්‍රචාරක ජාලය හරහාය.

 

එහෙත් විධායකය බලයට පත්ව වසරක් ගිය තැන ඇත්තේ එකී ව්‍යාපෘතික ගමනේ මෘදු චලනයක් නොවෙයි.මහමැතිවරණය දක්වා තනි විධායකයට සිදුවූයේ සිය අනුහස සහතික කිරීමේ බලකායන් පිහිටුවීමේ කාර්‍යයන්ට ප්‍රමුඛත්වය දීමයි.පළමු කොවිඩ් රැල්ල විසින් ඇති කළ නව තත්වයන් කළමණාකරණය කෙරුණේ ඉදිරි මහ මැතිවරණය ජයග්‍රහණය කිරීමේ උපක්‍රමික සැලසුම් ලෙසය.මහමැතිවරණයේ විශාල ජයග්‍රණයකුත් සහිතව සිය සැලසුම් කරා යාමට බරපතළ බාධකයක් ලෙස දෙවෙනි කොරෝනා රැල්ල ද දැන් පතිත වී තිබෙයි.මේ වන විට ලංකාවේ කොරෝනා අර්බුදයේ දිශානතිය පිළිබද පැහැදිළිතාවයක් වත්මන් බලාධිකාරයට නොමැති බව පැහැදිළි වෙමින් තිබෙයි.කොරෝනා මර්දනය කිරීමේ සමස්ත යාන්ත්‍රණය පවතින්නේ ඒකමිතියකින් තොර වියවුලකය.කොවිඩ් දෙවෙනි රැල්ල නිසා බරපතළ ආර්ථික-ජීවන අර්බුදයකට පත් ව ඇති බහුතර පහල පාංතික ජනයා වෙත සුබසාධන හා ජීවනෝපාය තත්වයක් සලසා දීමට පාලන තන්ත්‍රය තීරණාත්මකව අපොහොසත් වී තිබෙයි. විවිධ පහළ පාංතික ජන කොටස් අතර සිය මූලික ආහාර අවශ්‍යතා සදහා විරෝධතා දැක්වීමේ තත්වයක් නිර්මාණය වෙමින් තිබෙයි.එම ජනතාව වෙත ආහාර ඇතුළු මූලික අත්‍යවශ්‍ය ද්‍රව්‍ය ව්‍යාප්ත කිරීමේ ක්‍රමවත් වැඩපිළිවෙලක් ආණ්ඩුව සතුව නැත.මෙම තත්වය හේතුවෙන් බහුතර පහළ පාංතික සමාජ ස්ථර අතර අතෘප්තිමත් කළකිරීමක් මෝදු වෙමින් පවතින බවද නිරීක්ෂණය කළ හැකිය.

 

ඒ අතර ගෝඨාභය ප්‍රමුඛ බල අක්ෂය විසින් අනුදත් ඉහළ ස්ථරයේ ආර්ථික ආයෝජන-සංවර්ධන ව්‍යාපෘතියද මේ වනවිට ඇනහිට තිබෙයි.එය හුදු කොවිඩ් දෙවෙනි රැල්ලේ ලාංකේය ප්‍රතිඵලයක් පමණකටත් වඩා කොවිඩ් ප්‍රහාරය හේතුවෙන් ගෝලීය ධනේෂ්වර ආර්ථික සංවර්ධන මොඩලයම පත් ව ඇති දැවැන්ත අර්බුදයේම පරාවර්තනයකි.ඉදිරියේ බොහෝ කාලයක් පුරාම මෙම ගෝලීය ධනේෂ්වර ආර්ථික කඩාවැටීමේ විපාකයන් සංකීර්ණ කෙරෙනු ඇත.ඒ අනුව මහා ප්‍රාග්ධනයේ මැදිහත් වීම ඇතූළු ඉහළ ස්ථරයේ ආර්ථික ආයෝජන පිළිබද සැලසුම් අනපේක්ෂිත තත්වයකට ලක් ව තිබෙයි. කලින්ද දැක්වූ පරිදි ගෝඨාභය ප්‍රමුඛ බල තන්ත්‍රයේ ආර්ථික වැඩපිළිවෙල ලෙස ඉදිරිපත් කෙරුණේ ඉහළ ආර්ථික-සංවර්ධන ව්‍යාපෘතීන්ගේ ප්‍රතිලාභ පහළට කාන්දු කෙරෙන යෝජනාවකි.මේ වනවිට මුදුනින්ම අභියෝගයට ලක් ව ඇත්තේ එම ආර්ථික-දේශපාලන න්‍යාය පත්‍රයයි .

 

අනෙක් අතට වත්මන් ආණ්ඩුව බලයට රැගෙන ඒමේ මූලික හස්තයක් වූ සිංහල-බෞද්ධ වාර්ගික-ජාතිකවාදී බලඇණියේ ඒකමිතිය මේ වනවිට යම් සසැලීමකට ලක් ව තිබෙයි.ජනතාව මුහුණ දෙමින් ඇති වත්මන් ඓන්ද්‍රීය ප්‍රශ්නයන් වාර්ගික පසමිතුරුතාවයන් කරා විතැන් කිරීමේ ප්‍රයත්නයන් තිබුණද මීට වසරකට පෙර තිබුණු තරම් එහි ඉක්මන් ප්‍රතිඵල පිළිඹ්බු වන්නේ නැත.බලාධිකාරයේ බල කේන්ද්‍රයන් අතර වන ආතතීන් නිසා අධිපති වාර්ගික ජාතිකවාදයේ දෘෂ්ටිමය මෙහෙයුම් යම් විකේන්ද්‍රීය ස්වාභාවයක් ගෙන ඇත.සිංහල බෞද්ධ වාර්ගික ජාතිකවාදයට ඇති දෘෂ්ටිවාදී සුජාතකරණයේ බලය බිදවැටී ඇති බවක් මින් කිසිසේත්ම අදහස් වන්නේ නැත.කලින් පැවති සමෝධානයේ යම් තත්වාරෝපිත වෙනසක් පමණක් සිදුව ඇති බව නිරීක්ෂණය කළ හැකිය.කොහොමටත් අධිපති වාර්ගික ජාතිකවාදයට සිය ඒකමිතික බලය පවත්වා ගත හැක්කේ විපක්ෂ බලවේගයක් ලෙස පවතින තත්වයක් තුළය යන්න මෙහිදී අමතර කරුණක් ලෙස මතක් කළ යුතුය.

 

ඒ අනුව වත්මන් අභ්‍යන්තර හා බාහිර සාධක නිසා පාලක බලාධිකාරයේ ආර්ථික ව්‍යාපෘතික  හා දෘෂ්ටිවාදී මෙහෙයුම්-ප්‍රචාරක යාන්ත්‍රණයන් කලින් සැලසුම් කර තරමින් මේ වනවිට වැඩ කරන්නේ නැත. සිවිල්-මිලිටරි තන්ත්‍රයක් පෙරටු කරගනිමින් ආණ්ඩුවේ මර්දන හස්තය ඉදිරියට එමින් තිබෙන්නේ ආණ්ඩුව අභ්‍යන්තරිකව මුහුණ දෙමින් ඇති ඉහත අර්බුදයට දැක්විය හැකි ප්‍රතිචාරයක් ලෙසය.මර්දනයේ උපකරණයන් ඉදිරියට පැමිණෙන්නේ හෙජමොනික දේශපාලනයේ අසාර්ථකත්වය තුළ බව මෙහිදි සිහිපත් කළ හැකිය. ජනාධිපතිවරයාගේ සිවිල්-මිලිටරි ගජමිතුරු කල්ලිය වඩා අනුදත් පාලන ශෛලිය ද මීට අතිරේක ආයෝජනයක් එක් කරනු ලබයි. රාජපක්ෂය ප්‍රමුඛ පාලක බලාධිකාරයේ හෙජමොනික දේශපාලන මානය සම්පූර්ණයෙන්ම බිදවැටුණු තත්වයක් නිර්මාණය වී ඇතැයි මින් වරදවා නොගත යුතුය.ඒ වෙනුවට කොවිඩ් සංකීර්ණය විසින් උද්ගත කර ඇති වත්මන් හා අනාගත අභියෝග විසින් ඇති කෙරුණු තත්වයක් ලෙස මෙය හදුනාගත හැකිය.

 

බලාධිකාරය මේ වනවිට පසුවන්නේ සිය පළමු වසරේ මධුසමය සාර්ථකව ගත කිරීමට නොහැකි වීමේ අර්බුදයකය.එය මීට පෙර බලයට පත් ආණ්ඩු වලට මුහුණ දීමට නොලැබුණු නව තත්වයකි.කොවිඩ් මර්දනය කෙරෙන කාලයක් නිශ්චිතවම උපකල්පනය කළ නොහැකිය.යම් ඉක්මන් දිනක මර්දනය කෙරුණා වුවද ඉන් ඇති කළ ආර්ථික-දේශපාලන ප්‍රතිවිපාක තව දිගුකලක් පවතිණු ඇත.වත්මන් පාලන තන්ත්‍රයට ඊට මුහුණ දීම කිසිසේත්ම පහසු වන්නේ නැත.පශ්චාත් කොවිඩ් ධනවාදී ලෝක ක්‍රමය තුළ ලංකාවට මුහුණ දීමට සිදුවන අර්බුදය සිතනවාට වඩා ගැඹුරුය.ඒ අනුව වත්මන් පාලක බල හවුලේ ඉදිරිකාලය තුළ ජනතා කැමැත්ත නැවත සංවිධානය කරගැනීම කිසිසේත්ම පහසු කාර්‍යයක් නොවෙයි.පළමු වසර තුළම ජනතා මතකය තුළ ආණ්ඩුව පිළිබදව ඇති සටහන යහපත් නැත. ජනතා-ජනප්‍රියවාදී මොහොතක් තවමත් නිසි ලෙස නිර්මාණය වී නොමැති වුවද ජනතා අතෘප්තිය ක්‍රමයෙන් මෝදුවෙමින් එන ආකාරය ලංකාවේ ප්‍රජාතන්ත්‍රවාදී-වාම බලවේගයන්ගේ සක්‍රීය නිරීක්ෂණයට ලක් විය යුතුව තිබේ. ඒ සදහා කාලය නම් නිශ්චිතවම එළඹ ඇත.

 

- විදර්ශන කන්නන්ගර

එකළොස් දෙනකුට මරු කැඳවූ මහර බන්ධනාගාරයේ සමූහ ඝාතනය වෙඩි තැබීම නිසා සිදුවූවක් යැයි මියගිය රැඳවියන්ගේ ඥාතීන් සහ ඇසින් දුටුවන් විසින් කරනු ලැබු හෙළිදරව් කිරීම් අධිකරණය හමුවේ තහවුරු වී ඇත.

 

බන්ධනාගාරය තුළදී රැඳවියන් මරණයට පත්වූයේ ඔවුන් අතර හටගත් ගැටුමක් හේතුවෙන් බවට ආණ්ඩුවේ මැති ඇමැතිවරුන් ඇතුලු බලධාරීන් විසින් ගෙනයනු ලබන ප්‍රචාරය බොරුවක් බව එමගින් සනාථ වී තිබේ.

 

ප්‍රහාරය ඇසින් දුටු මහර බන්ධනාගාර කාර්ය මණ්ඩල සාමාජිකයකු මෙන්ම, ප්‍රහාරයෙන් දිවි ගලවාගත් රැඳවියකු විසින් ද දින කිහිපයකට පෙර ජේඩීඑස් හා කියා සිටියේ බන්ධනාගාර ‌ජේලර්වරුන් විසින් රැඳවියන් ඉලක්ක කරමින් නොවැම්බර් 29 රාත්‍රියේ වෙඩි තැබූ බව ය.

 

''රැඳවියන්ට වෙඩි තිබ්බේ පොලිසියවත්, පොලිස් විශේෂ කාර්ය බලකායවත් නෙමෙයි, බන්ධනාගාරයේ ‌ නිලධාරීන්,” යැයි සිය අනන්‍යතාවය හෙළි නොකරන්නැයි ඉල්ලා සිටි නිලධාරියකු ජේඩීඑස් හා පැවසීය.

 

අපරාධ පරීක්ෂණ දෙපාර්තමේන්තුව විසින් මහර බන්ධනාගාරයේ ඝාතන පිළිබදව කරනු ලබන විමර්ශනයේ වාර්තාවක් ඊයේ දින (8) මෝසමක් මඟින් වැලිසර මහේස්ත්‍රාත් අධිකරණය වෙත ඉදිරිපත් කරමින් නීතිපති දෙපාර්තමේන්තුව කරුණු දක්වා තිබුණේ ද වෙඩි තැබීමෙන් මරණ සිදුවූ බවට ය.

 

“පළමුවැනි වතාවට අද නීතිපති විසින් ඉදිරිපත් කරපු වාර්තාවේ මෙහි වෙඩි තැබීමක් සිදුවූ බව තහවුරු වෙලා තියෙනවා,” යි සිරකරු අයිතිවාසිකම් සුරැකීමේ කමිටුවේ සේනක පෙරේරා නීතිඥවරයා අධිකරණ කටයුතු හමාර වී මාධ්‍යවේදීන් හමුවේ කියා සිටියේය.

 

'බෙහෙත් පෙති ගහලා නෑ'

 

මහර රැඳවියන් 11 දෙනා වෙඩි තැබීමක් හේතුවෙන් මිය ගොස් ඇති බවටත්, රැඳවියන් මානසික රෝගීන්ට ලබා දෙන ඖෂධ පානය කර මත්වී කලහකාරීව හැසිරි ඇති බවට සාක්ෂි නොමැති බවටත් රහස් පොලිසියේ විමර්ශන වාර්තාව උපුටා දක්වමින් නීතිපතිවරයාගේ සම්බන්ධිකරණ නිලධාරිනි, රජයේ අධිනීතිඥ නිශාරා ජයරත්න විවෘත අධිකරණය හමුවේ පවසා තිබේ. රැඳවියන් අතර නොසන්සුන්තාවයක් ඇතිවී එය ගැටුමක් දක්වා වර්ධනය වීමට හේතුව බන්ධනාගාරයේ කෝඩිඩ් ආසාදිතයන් හඳුනාගන්නා පරීක්ෂණ නිසි පරිදි නොපවැත්වීම යැයි ද රහස් පොලිස් වාර්තාව උපුටා දක්වමින් රජයේ අධිනීතිඥවරිය අධිකරණය හමුවේ වැඩිදුරටත් පවසා ඇත.

 

සිරකරු අයිතිවාසිකම් සුරැකීමේ කමිටුව විසින් පසුගිය 4 වැනිදා වැලිසර මහේස්ත්‍රාත් අධිකරණය හමුවේ මෝසමක් ගොනුකරමින් ඉල්ලා තිබුණේ මරා දැමුණු රැඳවියන්ගෙගේ සිරුරුවල පශ්චාත් මරණ පරීක්ෂණයක් සිදු නොකොට පුලුස්සා දැමීමට යන බැවින් එය වළකන ලෙස ය. ඒ අනුව එළැඹෙන 11 වැනිදා ඒ සම්බන්ධයෙන් කරුණු දක්වන ලෙසට නීතිපතිවරයාට සහ සෞඛ්‍ය බලධාරින්ට වැලිසර මහේස්ත්‍රාත් බුද්ධික සී රාගල විසින් නියෝග කොට තිබුණි.

 

ඒ අතරතුර නීතිපතිවරයා විසින් රහස් පොලිසියේ විමර්ශන ප්‍රගතිය අධිකරණය හමුවේ අනාවරණය කොට තිබෙන්නේ ඊයේ දිනයේදී ගොනුකරන ලද මෝසමක් යටතේය. එමෙන්ම ගිනි අවි විශේෂඥයකු මගින් ගිනි අවි විශ්ලේෂණයක් සිදුකරන බවටද අධිනීතිඥ නිශාරා ජයරත්න මහේස්ත්‍රාත්වරයා හමුවේ සඳහන් කොට ඇත.

 

මරා දැමුණු රැඳවියන්ගේ පශ්චාත් මරණ පරීක්ෂණ කටයුතු කඩිනමින් සිදුකරන ලෙසට නියෝග කරන්නැයි තමන් අධිකරණයෙන් ඉල්ලා සිටින බව සිරකරු අයිතිවාසිකම් සුරැකීමේ කමිටුව පවසයි.

 

''රැඳවියන් මරා දැමු බව නීතිය ඉදිරියේ සනාථ කරන්න නම් පශ්චාත් මරණ පරික්ෂණයක් පැවැත්විය යුතුමයි,” නීතිඥ සේනක පෙරේරා ජේඩීඑස් හා කීය.

 

“නීතිපතිවරයා අධිකරණයට දැනුම් දුන්නා විශේෂඥ අධිකරණ වෛද්‍ය නිලධාරි මඩුල්ලක් යටතේ පශ්චාත් මරණ පරික්ෂණ පවත්වන්න කටයුතු කරනවා කියලා. මියගිය රැඳවියන්ගේ ඥාතීන් වෙනුවෙන් අපි අධිකරණයෙන් ඉල්ලිමක් කළා ඔවුන් වෙනුවෙන් අධිකරණ වෛද්‍ය නිලධාරිවරයකුට පශ්චාත් මරණ පරික්ෂණයට සහභාගි වෙන්න ඉඩ දෙන්න කියලා. නමුත් නීතිපතිතුමා ඒකට විරුද්ධ වුණා. පසුව මහේස්ත්‍රාත්තුමා විමසුවා විශේෂඥ අධිකරණ වෛද්‍ය නිලධාරියෙක් නිරීක්ෂණ මට්ටමෙන් සහභාගි කරවන්න හැකිද යන වග. නමුත් නීතිපතිවරයා ඒකටත් නිසි පිළිතුරක් ලබා දුන්නේ නෑ''.

 

වෙඩි උණ්ඩවලට පසු රබර් උණ්ඩ

 

ජේඩීඑස් විසින් කරන ලද කරුණු සොයා බැලීම්වලදි සනාථ කර ගැනීමට හැකිවුයේ ද රැඳවියන්ගේ නොසන්සුන්තාවයට හේතුව බන්ධනාගාර ප්‍රධානින් විසින් කෝවිඩ් පරික්ෂණ නිසි පරිදි සිදු නොකිරීම බව ය.

 

“කෝවිඩ් බෝවෙයි කියලා බයෙන් හිටිය රැඳවියෝ මහර බන්ධනාගාරයේ නිලධාරින්ට ළඟට ගිහින් ඉල්ලා හිටියා තමන්ට PCR පරීක්ෂණ කරන්න කියලා. එතකොට නිලධාරීන් කිවුවේ 'අපිට ඉහළින් නියෝග කරලා තියෙනවා පරීක්ෂණ නවත්වන්නය කියලා'යි. රැඳවියෝ කලබල කරන්න පටන් ගත්තේ එතකොටයි. ඒ වෙනකොටත් වැලිකඩින් මාරු කරලා ගෙනාපු රැඳවියන් කිහිප දෙනකුටම කෝවිඩ් ආසාදනය වෙලා තියෙන බවට අඳුනගෙන තිබුණේ. රැඳවියෝ කළබල කරන්න ගත්තම නිලධාරීන් ඉතාම දරුණු විදිහට පහර දෙන්න පටන් ගත්තා. පස්සේ ඒක මුළු බන්ධනාගාරෙම රැඳවියෝ අතරට පැතිරිලා ගියාම ජේලර්ලා කළේ වෙඩි තියන ඒක''.

 

මහර බන්ධනාගාරයේ ඉහත කී නිලධාරියා වැඩිදුරටත් කියා සිටියේ කොළඹ ප්‍රදේශය භාර ජ්‍යෙෂ්ඨ නියෝජ්‍ය පොලිස්පති දේශබන්ධු තෙන්නකෝන් මහර බන්ධනාගාරයට එන විටත් වෙඩි තැබීම සිදුවෙමින් පැවති බව ය.

 

''ඩීඅයිජී තෙන්නකෝන් තමයි ඇවිත් කිවුවේ දැන් වෙඩි තිබ්බා ඇති ටිකක් නවත්වන්න කියලා. හැබැයි ඊට පස්සෙත් වෙඩි කිහිපයක් එල්ල කළා. රබර් උණ්ඩවලින් වෙඩි තිබ්බෙත් ඊටත් පස්සේ. කිහිප දෙනෙකුටම වෙඩි වැදිලා තිබුණේ ඔළුවට.''

 

කැරලි මර්දනයේ දී වෙඩි තැබීමේ අනුමත පිළිවෙත වන්නේ ජීව උණ්ඩ පාවිච්චි කරන්නට පෙර රබර් උණ්ඩ යොදා ගැනීම ය.

 

ජේඩීඑස් විසින් කරන ලද විමසීමකදි මහර බන්ධනාගාරයේ රැඳවියකු විශ්වසනීය අතරමැදි පාර්ශවයක් ඔස්සේ සම්බන්ධ කර ගනිමින් තහවුරු කරනු ලැබුවේ ද වෙඩි තැබීම සිදුකරන ලද්දේ බන්ධනාගාරයේම නිලධාරින් විසින් බව ය.

 

''අපිට වෙඩි තිබ්බේ වෙන කවුරුත් නෙමෙයි ජේලර් මහත්තුරු. වෙඩි තියන්න කලින් සිරකරුවන්ගේ අතපය කැඩෙන්න ගැහුවා. පස්සේ කටිටිය ඇවිස්සුනාම වෙඩි තිබ්බා. පණ බේරගෙන දුවන අයටත් වෙඩි තිබ්බා. අනෙක හැම සිරකරුවෙක්ම හිර කූඩූවලින් ඒළියට ආවේ නෑ. එහෙම ආවා කියන ඒක බොරුවක්,” යැයි එම රැඳවියා කීය.

 

බලෙන් අත්සන් ගැනීම

 

සිය සහෝදරයා වන අමිත් සුබසිංහ බන්ධනාගාර නිලධාරින් විසින් වෙඩි තබා මරා දමා ඇතැයිද, මළ සිරුරු හඳුනා ගැනීම සඳහා රාගම රෝහලේ මෘත ශරිරාගාරයට ගිය විට පොලිසිය ප්‍රමුඛ නිලධාරින් තමන්ට තර්ජනය කරමින් පෝර්ම කිහිපයකට බලහත්කාරයෙන් අත්සන් ලබා ගත් බවද මියගිය රැඳවියකු වන අමිත් සුබසිංහගේ සහෝදරියක් වන ලක්මාලි නිලූෂානි චෝදනා කරන්නීය.

 

''කිරිබත්ගොඩ පොලිසියේ අසේල සඳරුවන් කියන අයිපී මහත්තයා පහුගිය 4 වෙනිදා අපිට කෝල් එකක් දීලා කිවුවා මැරිලා ඉන්න අයගේ පොටෝ දාලා තියෙනවා රාගම ඉස්පිරිතාලෙට ඇවිත් අඳුනගන්න කියලා. මම ඉස්පිරිතාලෙට ගියාම එතනින් කිවුවා මහර බන්ධනාගාරෙට යන්න කියලා. බන්ධනාගාරෙට ගියාම එතන හිටපු අය මට බැන්නා මෙතන මීනි නෑ, ගිහින් ඉස්පිරිතාලේ මෝචරියේ බලනවා කියලා. ඊට පස්සේ මම ආයෙත් රාගම ඉස්පිරිතාලෙට යන්න යද්දි කිරිබත්ගොඩ පොලිසියේ අසේල සඳරුවන් කියන නිලධාරියා බන්ධනාගාරේ ඇතුලේ ඉඳන් ඇවිත් මට කිවුවා මිනී දාලා තියෙන්නේ මෝචරියේ එතන්ට ගිහින් කට උත්තරයක් දෙන්න කියලා. මම රාගම ඉස්පිරිතාලේ මෝචරියට ගියාම ඒතන හිටිය අය මට අයියාගේ මළ සිරුරු ළඟටවත් යන්න දුන් නෑ. දුර ඉඳන් බලලා අඳුනගන්න කිවුවා. අයියගේ පපුවට ප්ලාස්ටර් අලවලා තිබුණේ. ඒ ගැන අහපුවාම ඒතන හිටිය අය මට කිවුවේ, වෙඩි වැදිච්ච තුවාල කියලයි. අයියගේ සිරුර අඳුනගෙන මම ඇහුවා කොහොමද මගේ අයියා මැරුණේ, ඇයි වෙඩි තිබ්බේ කියලා. තමුන්ට මොකටද ඒවා. පණ්ඩිතකම් කතා නොකර යනවා යන්න කියලා එතන හිටපු අය මට බැන්නා.”

 

අවසන් කටයුතු සිදු කිරීම සඳහා සිය සහෝදරයගේ සිරුර තමන්ට භාර දෙන්නැයි ඉල්ලු විට ඇයට සිදුවී ඇත්තේ රෝහල් කාර්ය මණ්ඩලයේ නින්දා අපහාස වලට මුහුණ දීමට ය.

 

''මුන්ට කොරෝනා, පුච්චලා දාන්නයි ඉන්නේ. කොරෝනා හැදුන එවුන් ගෙවල්වලට අරන් ගිහින් ලෙඩ බෝ කර ගන්න ඕනේ දැ,” යි අසමින් මෘතශරිරාගාරයේ සිටියවුන් තමන්ට අපහාස කළ බවද ලක්මාලි නිලූෂානී කෝපයෙන් යුතුව පැවසුවාය.

 

ප්‍රහාරයෙන් මියගිය 11 දෙනාගෙන් 8 දෙනකුම කොරෝනා ආසාදිතයන් බැවින් ''මරණ පරීක්ෂණ දැඩි සෞඛ්‍ය ආරක්ෂණ ක්‍රම යටතේ සිදුකෙරෙන බව'' පසුගිය 5 දා වත්තල මහේස්ත්‍රාත්වරයා හමුවේ රාගම ශික්ෂණ රෝහලේ ප්‍රධාන අධිකරණ වෛද්‍ය නිලධාරි සඳුන් විජේරත්න පවසා තිබුණි. 

 

රාගමට බැරි මරණ පරීක්ෂණ

 

මහර බන්ධනාගාර ප්‍රහාරයෙන් මරා දැමුවුවන්ට කෙරෝනා ඇතැයි පවසමින් රාගම රෝහල් කාර්ය මණ්ඩල සාමාජිකයන් මෙන්ම පොලිසියද මියගිය වූවන්ගේ ඥාතීන් බිය වද්දමින් සිරුරු පුලුස්සා දැමීමට සැලසුම් කරමින් සිටියද මානව හිමිකම් කොමිසම් සභාව නිරීක්ෂණය කොට ඇත්තේ ශික්ෂණ රෝහලක් වන උතුරු - කොළඹ රෝහලේ වයිරස් ආසාදිත මළ සිරුරු පිළිබඳ පරික්ෂණ පැවැත්වීමේ පහසුකම් නොමැති බව ය. මේ අතර, වසංගතයෙන් රෝගාතුර පිරිසක් වැලිකඩ බන්ධනාගාරයෙන් මාරුකර එවීම මහර නොසන්සුන්තාවක් ඇවිලවීමට මුල්වූ බව ශ්‍රී ලංකා මානව හිමිකම් කොමිසම විසින්ද හෙළි කරගෙන තිබුණි.

 

''වයිරස් ආසාදිත පුද්ගලයන්ගේ මළ සිරුරු සම්බන්ධයෙන් පරික්ෂණ පැවැත්වීමට ඔබ රෝහලේ පහසුකම් නොමැති බව අපගේ පරීක්ෂණවලින් හෙළිවී තිබේ. කොටිකාවත්ත රෝහලේ (IDH) එම පහසුකම් තිබෙන බැවින් ඒවා ලබා ගැනීමට අධිකරණයෙන් අවසර ඉල්ලා සිටීම සුදුසුය,'' යි කොමිසමේ විමර්ශන හා පරීක්ෂණ භාර කොමසාරිස්වරිය වන නීතිඥ රමණි මුත්තෙට්ටුවේගම විසින් පසුගිය පස්වැනිදා උතුරු-කොළඹ රෝහලේ අධ්‍යක්ෂ, වෛද්‍ය ඩබ්.ඒ.එම් ෂෙල්ටන් පෙරේරා වෙත යවා ඇති ලිපියේ සඳහන් ය.

 

වයිරස් ආසාදිතයන්ගේ සිරුරු බැහැර කිරීම් සම්බන්ධයෙන් කොමිසම දැනුවත්ව සිටින මුත්, රැඳවියන්ගේ මළ සිරුරු යනු දැනටමත් ආරම්භ කොට තිබෙන විමර්ශනයක එක් අංගයක් බැවින් ඒවා විනාශ නොකිරීමේ වැදගත්කම පෙන්වා දීමටද තමන් මෙම ලිපිය යොමු කරන බව කොමසාරිස්වරිය පවසා ඇත.

 

''එම නිසා එම සිරුරු සෞඛ්‍ය අවශ්‍යතාවලට ගැලපෙන පරිදි සංරක්ෂණය කළ හැකි මුත්, ඔවුන්ගේ මරණයට අදාළ පශ්චාත් මරණ පරික්ෂණ අවසන් වනතුරු ආදාහනය හෝ වෙනත් ආකාරයකින් විනාශ කිරීම හෝ නොකළ යුතු ය. ඊට අමතරව හැකි සෑම අවස්ථාවකදීම ඡායාරූප ගැනීම වැනි බාහිර පරීක්ෂණ ආරම්භ කළ හැකි අතර ඒවා වෝහාරික කණ්ඩායම්වලට ලබා දීමට කටයුතු කළ යුතුය''.

 

මහජන සෞඛ්‍යය සහ මානව හිමිකම් නොතකා හැරීමක්

 

මේ අතර දෙසැම්බර් 2 වැනිදා නිවේදනයක් නිකුත් කරමින් අන්තර් ජාතික විනිසුරුවරුන්ගේ කොමිසම (ICJ) ශ්‍රී ලංකාවේ රජයෙන් ඉල්ලා සිටින්නේ, මහර බන්ධනාගාරයේ රැඳවියන් ඉලක්ක කරමින් බන්ධනාගාර පාලකයන් විසින් කරන ලද මරාන්තික ප්‍රහාරය සම්බන්ධයෙන් අපක්ෂපාතී, එමෙන්ම කඩිනම් පරීක්ෂණයක් පවත්වන ලෙස ය.

 

''සිරකරුවන් මරණයට පත්කර, තවත් පිරිසකට තුවාල සිදුවන ආකාරයේ ප්‍රහාරයක් එල්ල කළ අය සම්බන්ධයෙන් විමර්ශනයක් පවත්වා අවශ්‍ය කටයුතු කඩිනමින් සිදුකළ යුතුයි,'' යනුවෙන් අයිසීජේ සංවිධානයේ නීති සහ ප්‍රතිපත්ති අධ්‍යක්ෂ ඉයන් සයිඩර්මන් විසින් නිකුත් කොට ඇති නිවේදනයේ සඳහන් ය.

 

මහර බන්ධනාගාරයේ ඇති වු තත්ත්වය මඟින් පෙන්නුම් කෙරෙන්නේ ශ්‍රී ලංකාවේ පිරිහී තිබෙන මානව හිමිකම් සහ මහජන සෞඛ්‍යයේ ස්වභාවය සම්බන්ධයෙන් රජයේ බලධාරින් දක්වන නොසැලකිලිමත් මැදිහත් වීම යැයි ද අන්තර් ජාතික විනිසුරුවරුන්ගේ කොමිසම පවසයි.

 

රැඳවියන්ගේ ඥාතීන් විශාල පිරිසක් පසුගිය දින කිහිප පුරාම බන්ධනාගාරය අවටත්, උතුරු - කොළඹ (රාගම) ශික්ෂණ රෝහල අසලත් රැඳි සිටියේ මහර බන්ධනාගාරයේ රැඳවියන් ඉලක්ක කොට එල්ල කරන ලද ප්‍රහාරයෙන් සිය සමීපතමයා මියගොස් සිටින්නේ ද, එසේත් නැත්නම් තුවාල ලබා රෝහල් ගත කොට සිටින්නේ ද යනුවෙන් නිශ්චිත තොරතුරක් දැන ගැනීමේ අටියෙනි. ඒ අතරින් කිහිප දෙනකුම JDS හා කියා සිටියේ තමන්ගේ ස්වාමී පුරුෂයන්, දරුවන් පිළිබඳව කිසිදු නිශ්චිත තොරතුරුක් දැන ගන්නට නැති බව ය.

 

පොළොව යට සිර මැදිරි

 

අතුරුදහන් වී ඇතැයි පැවසෙන රැඳවියන් සම්බන්ධයෙන් ජේඩීඑස් විසින් කරන ලද සොයා බැලීමකදි දැන ගන්නට ලැබුණේ යම් රැඳවියන් පිරිසක් මහර ප්‍රහාරයෙන් පසු රැගෙන ගොස් වැලිකඩ බන්ධනාගාරයේ රහසිගතව පවත්වාගෙන යන අභ්‍යන්තර සිරමැදිරි කිහිපයක සිර කොට ඇති බව ය. එම සිරකුටි භාවිතා කරන්නේ රටපුරා ඇති බන්ධනාගාරවල පාලනය කරගත නොහැකි යයි නිලධාරීන්ට සිතෙන රැඳවියන් දිගුකලක් සිරකොට තැබීම සඳහා යැයි ද, එම මැදිරිවලට දමන රැඳවියන් දරුණු වධහිංසාවන්ට ලක් කරන බවද විශ්වාස කටයුතු ලෙසින් අපට දැන ගන්නට ලැබී ඇත.

 

ඒ බව සනාථ කරමින් මහර ප්‍රහාරයෙන් පසු අතුරුදහන්ව ඇතැයි පැවසු රැඳවියකගේ බිරිඳක් ජේඩීඑස් හා කියා සිටියේ සිය ස්වාමි පුරුෂයා එවැනි රහස් මැදිරියක සිරකොට සිටින වග තමන්ට දැන ගන්නට ලැබුණු බවකි. ඇගේ සැමියා සමූහ ඝාතනය සිදුවූ දිනයෙන් පසුවත් ඇය සමග දුරකතනයෙන් කතා කර තිබේ.

 

දැන් ඔහු ආගිය අතක් නොමැත.

 

''මගේ මහත්තයාව මහරට මාරුකරලා තිබුණේ වැලිකඩ ඉඳලා. මුල් දවස් දෙකේම අපිට රාගම ඉස්පිරිතාලේ පැත්තටවත් යන්න පොලිසියෙන් ඉඩ දුන් නෑ. අපි කිවුවා ඉස්පිරිතාලෙට ගිහින් බලන්න ඉඩ දෙන්නේ නැත්නම් අඩුගානේ තුවාල වෙලා ඉන්න අයගේ නම් හරි අපිට කියන්න කියලා. තුන්වෙනි දවසේ තමයි නම් ලිස්ට් එකක් දැම්මේ. ඒ වුණාට ගොඩක් දෙනෙක්ගේ නම් තිබුණේ නෑ. හතරවෙනි දවසේ කිවුවා වැලිකඩට කට්ටියක් මාරු කළා කියලා. පස්සේ මම වැලිකඩට ගිහින් අහපුවාම එතන හිටපු නිලධාරින් කිවුවේ 200ක් විතර ගෙනත් දාලා ඉන්නවා, ඒ වුණාට නම් එළි කරන්න බෑ කියලයි,'' යනුවෙන් රාගම, නවලෝක ගම පදිංචි 33 හැවිරිදි ඩිලාන් චාමර සමරවික්‍රමගේ බිරිඳ වන එරන්දි මිහිරාණි කියුවාය.

 

ඈ වැඩිදුරටත් කියා සිටියේ සිය ස්වාමිපුරුෂයා පසුගිය ඉරුදින (06) තමන්ට දුරකතනයෙන් කතා කොට කෙසේ හෝ ඔහු බේරා ගන්නා ලෙස ඉල්ලා සිටි බවයි.

 

''මගේ මහත්තයා මට කතා කරලා කිවුවා එයාව වැලිකඩ පොලොව යට සිරමැදිරියක හිරකරලා තියගෙන ඉන්න බව. එයා ඒක්ක තව 25 විතර ඉන්නවා කියලාත් මහත්තයා මට කිවුවා. මහර සිද්ධියෙන් පස්සේ ඒ අයව අල්ලගෙන ගිහින් හොඳටම ගහලා තමයි ඒ සිරමැදිරිවලට දාලා තියෙන්නේ. මගේ මහත්තයා මට කිවුවා එතැන ඉන්න ගොඩක් රැඳවියන්ට උණ, කැස්ස තියෙන බව. ඒ වුණාට බන්ධනාගාරේ ජේලර් මහත්තුරු කියනවලු 'තොපි මැරෙන්න ඉන්න එවුන්, ‌ගේට්ටු කඩාගෙන යන්න නේ තොපි ගියේ, කොරෝනා හැදිලාම මැරිලා පලයල්ලා, තොපිට බොන්න පැනඩෝල් පෙත්තක්වත් අපි දෙන්නේ නෑ' කියලා.''

 

තමන් සිය ස්වාමියාගේ අතුරුදහන් වීම පිළිබඳව දින කිහිපයකට පෙර ශ්‍රී ලංකා මානව හිමිකම් කොමිසම හමුවේ පැමිණිල්ලක්ද ගොනු කළ බව ද ඇය පවසා සිටියාය.

 

ප්‍රහාරයෙන් පසුව තවත් රැඳවියන් පිරිසක් මහර බන්ධනාගාරයේ පවත්වාගෙන යන රහසිගත සිරමැදිරි සංකීර්ණයකට දමා සිරකොට ඇතැයි ඇසින් දුටුවකු විසින් තමන් සමඟ කියා සිටියේ යැයි එක් පුද්ගලයකු ජේඩීඑස් හා ප්‍රකාශ කළේය.

 

''මහර බන්ධනාගාරේ කෙනෙක්ම තමයි මට මේක කිවුවේ. හිරකරලා තියන් ඉන්න රැඳවියෝ අතරේ තුවාලකරුවන් විශාල පිරිසක් මෙන්ම කෝවිඩ් ආසාදිත යැයි සැක කෙරෙන පුද්ගලයන්ද ඉන්නවා කියලයි කියන්නේ. හුස්ම ගැනීමේ අපහසුතා තියෙන, වෙනත් ලෙඩ රෝගවලට ප්‍රතිකාර ගන්න අයත් එතන ඉන්නවලු. මට දැන ගන්න ලැබුණු විදිහට බන්ධනාගාර නිලධාරීන් එහෙම කරන්නේ රැඳවියන්ගෙන් පළිගැනීමේ අදහසින්,'' ඔහු කීය.

 

මේ අතර මහර බන්ධනාගාරයේ රැඳවියන් ඝාතනය කළ ප්‍රහාරය පිළිබදව කරුණු සොයා බැලීමට මහාධිකරණයේ හිටපු විනිසුරුවරියක වන කුසලා සරෝජනි වීරවර්ධනගේ සභාපතිත්වයෙන් පත් කරනු ලැබූ පංච පුද්ගල කමිටුවේ අතුරු වාර්තාවක් පසුගිය 7 දින අධිකරණ සහ බන්ධනාගාර විෂය භාර කැබිනට් ඇමතිවරයා වන ජනාධිපති නීතිඥ අලි සබ්රි වෙත භාරදෙනු ලැබුණි. 

 

- කිත්සිරි විජේසිංහ (www.jdslanka.org)

Wednesday, 09 December 2020 19:37

සාදික්කා කතා වස්තුව

Written by

සාදික්කා ගෙඩියට ඇත්තේ ලේ වැකුණු ඉතිහාසයකි. ඉන්දුනිසියාවේ බන්දා දුපත් වලට සීමා වී තිබූ සාදික්කා වගාව අත්පත් කර ගැනීම සඳහා ලන්දේසීන් කල කුරිරු සටනින් අවසානයේ ඉතිරි වූයේ දූපත් වාසීන් 15000 ක් අතරින් දහසක් පමණක් බව කියවේ. 

 

ක්‍රි.ව. 6 වන සියවසේ දී පමණ ඉන්දියාවට හඳුන්වා දී ඇති සාදික්කා ශාකය ඉංග්‍රීසින් විසින් 19 වන සියවසේ දී ලංකාවේ වගා කරන ලදී. සාදික්කා එක් අතකින් අති විශේෂ කුළුබඩුවකි. එයට හේතුව නම් සාදික්කා සහ වසාවාසි යන එකිනෙකට වෙනස් කුළුබඩු වර්ග දෙකක් එකම ශාකයෙන් ලබා ගත හැකි වීමයි. කුළුබඩුවක් ලෙස පමණක් නොව විවිධ රෝග සඳහා ඖෂධයක් ලෙසත් සාදික්කා අතීතයේ සිටම භාවිතා වී ඇත. මෑත කාලීනව කල පර්යේෂණ මගින් ද එහි ඇති විවිධ ඖෂධීය ගුණ පිළිබඳ මනාව තහවුරු කර ඇත. 

 

සාදික්කා වල අඩංගු ප්‍රධාන රසායණික සංයෝගය මිරිස්ටිසින් වේ. බත් වුවත් වැඩියෙන් කෑවොත් අගුණ වන්නා සේම සාදික්කා ද අධි පරිභෝජනය මාරක ප්‍රතිපල වුව අත්කර දිය හැක. සාදික්කා කුඩු ග්‍රෑම් 5 කට වඩා වරකට පරිභෝජනය විෂ සහිත බව පර්යේෂණ මගින් පෙන්වා දී ඇත. තවත් එක් වාර්තාවක දැක්වෙන පරිදි අවුරුදු 8 ක දරුවෙක් සාදික්කා ග්‍රෑම් 14 ක් ආහාරයට ගැනීම හේතුවෙන් මරණය‍ට පත් වී ඇත. මරණයට අමතරව මොලයට සිදුවන විවිධ අහිතකර බලපෑම් ද ඇත.

 

සාදික්කා ගැන අවස්ථා කීපයකදීම ලියන්නට සිදුවූයේ වර්තමානයේ අප රටේ සාදික්කා ඇසුරෙන් නිපදවා ඇති පැණිය නිසා ය. මේ පැණිය තුල නම් අධික සාන්ද්‍රණයකින් සාදික්කා අන්තර්ගතව ඇතැයි මම නොසිතමි. එසේ වූවා නම් මේ වන විට ඒ බව වාර්තා වී තිබෙනු ඇත. ගැටළුව ඇත්තේ පැණිය සාදන්නට අපේ උදවිය විවිධ වට්ටෝරු සමාජ ගත කරමින් සිටීමය. සාදික්කා මගින් ඉක්මණින් ප්‍රතිපල ලබා ගැනීමට කවුරුන් හෝ අධික ලෙස ආහාරයට ගත හොත් එමගින් ඉතා හානිදායක ප්‍රතිපල ඇතිවීමට ද ඉඩ ඇත. බෙහෙතක් යනු යම් මාත්‍රාවකට අනුව ලබා ගත යුතු දෙයකි. එබැවින් අන්තර්ජාලයේ හුවමාරු වන කිසිදු වගකීමකින් තොර වට්ටෝරු අත්හදා බලන්නට ගොස් අමාරුවේ වැටෙනවාට වඩා කරුණු දැන සිහි නුවණින් කටයුතු කිරීම වඩා උචිත බව සටහන් කර තබමි.

 

(මෙහි ඇති කරුණු සියල්ල තහවුරු කල හැකි විද්‍යාත්මක ලේඛණ පදනම්ව ලියා ඇති බව සඳහන් කරමි.)

 

- අරුණ රණවක

දෙන්නගෙන් එක්කෙනෙක් ඉතාම කිට්ටුවෙන් ඇසුරු කරපු දේශපාලන ජීවිතයේදී ළඟින් හිටපු කෙනෙක් .ඒ ලලිත් ,ඇසුරු කරලා නැති උනත් එකම දේශපාලන භාවිතාවක මේ සමාජය වෙනස් වෙන්න ඕනි කියන දේශපාලන අරමුණක වැඩ කරන්න සූදානම් වෙලා  වමේ  ව්‍යාපාරයක වැඩ කරන්න අධිෂ්ඨානයෙන් මැදිහත් වුන මිනිහෙක් කුහන්. මේ දෙසැම්බර් මාසේ දහවැනිදා කියන්නේ ලෝක මානව හිමිකම් දිනය.ඒත් උඹලා දෙන්නම අතුරුදහන් කරලා මේ වෙනකොට අවුරුදු ගණනාවක් ගෙවිලා ගිහින් .

 

ගොඩක් දෙනෙකුට ඒ සිදුවීම මේ වෙනකොට සිදුවීමක් විතරයි .සමහරු අහනවා ලලිත් කුහන් කියන්නේ කවුද කියලා .ඔව් ,සමාජයේ සමහර අය  දන්නෙත් නෑ උඹලා කවුද කියලවත් එක අතකට ඒක සමාජයේ වරදකුත් නෙවෙයි .මොකද අපේ සමාජය ඒ තරමට නිද්‍රාශීලීයි.කවුද මරන්නේ,   මොකටද මරන්නෙ  කවුද අතුරුදහන් වෙන්නේ, ඇයි අතුරුදහන් කරන්නේ ,කාටද එහෙම කරන්න ඕනේ මේ වගේ කාරණා  තමන්ටම එහෙම වෙනකම් අපේ සමාජයට අදාල නෑ.

 

අවුරුදු හතකට  අටකට පස්සෙත්  මේ සමාජයේ මේ  වගේ සිදුවීම් ඕන තරම් වෙලා තියෙනවා .දැනුත් මේ මොහොතෙත් වෙමින් තියනවා .ඒත් මේ සමාජය නිහඬයි . ඒ නිහඬබව බිඳින මිනිස්සු  දැන් පළවෙනි ගල ගහන්න සූදානම් වෙන්න ඕනේ .ලලිත් කුහන් ,ශරීරයෙන් පුංචි වුනත් උඹලට මේ රටේ මහා සන්නද්ධ බලයක් තිබ්බ පාලකයෝ බයවුනා .

 

ඒ බය වීම උඹලා දෙන්න අතුරුදහන් කරන තැනකට ම තල්ලු කෙරුවා .  අදත්  මේ සමාජය ඒක අත්විඳිමින් ඉන්නවා .විශේෂයෙන් මේ  දෙසැම්බර් මාසේ දහ වෙනිදාට   යෙදෙන මානව හිමිකම් දිනය දවසට අද දවසේ ලාංකීය සමාජයට ඒක විශේෂ පණිවිඩයක් ගේනවා. අදත් මහර බන්ධනාගාරය ඉස්සරහ අම්මලා තමන්ගේ දරුවන්ව ඉල්ලලා පාලකයන්ගේ දෙපා මුල වැඳ වැටි වැටී කඳුළු වගුරුවනවා.තමන්ගේ පුතාගේ  පින්තූරය අතේ තියාගෙන අදත්  අම්මා  කෙනෙක් අඩා වැලපෙද්දි ,ලලිත් ගේ තාත්තා නංගිලා ,කුහන් ගෙ බිරිඳ දුව ඒ වගේම දහස් ගණන් උතුරේ දකුණේ අම්මලා තමන්ගෙ දරුවෝ ඉල්ලලා ,ස්වාමිපුරුෂයන් ඉල්ලලා මහපාරේ, ගිනි අව්වේ   හිරගෙවල් ,පොලිසි, බන්ධනාගාර ගානේ  හඬා වැලපෙමින් නගපු අඳෝනා  තවමත් ඉවර නෑ නේද කියලා  හිතෙනවා ඇත්තටම අපි  ඒ වැළපීම් වලට තිත තැබිය යුතු  නැද්ද ....?

 

- හේමමාලි අබේරත්න

සිංසි බුවා