Tuesday, 12 September 2017 22:56

රෝහින්ග්‍යා අර්බුදයට දළයි ළාම අතීතයෙන් සංග්‍රහ කරයි

Written by 
Rate this item
(0 votes)

බෞද්ධ බහුතරයක් සහිත මියන්මාරය හැර පළා යන රෝහින්ග්‍යා ජන රැල්ල සම්බන්ධයෙන් දලයි ලාමා අදහස් පළ කළහ. බුදුරජාණන් වහන්සේ සිටියා නම් විපතට පත් රෝහින්ග්‍යා ජනතාවට උපකාර කරනු ඇති බව උන්වහන්සේ මාධ්‍යවේදීන් හමුවේ අදහස් දක්වමින් පැවසූහ.

 

රෝහින්ග්‍යා මුස්ලිම් ප්‍රජාවට එරෙහි ප්‍රචණ්ඩ ක්‍රියා අවසන් කිරීමට කටයුතු කරන ලෙස උන්වහන්සේ මීට ඉහත දී නොබෙල් සාම ත්‍යාගයෙන් පිදුම් ලත් එරට නිල නොවන නායිකා අවුන් සාන් සුචීගෙන් ඉල්ලීමක් කර තිබිණි.

මේ අතර මියන්මාරයේ රෝහින්ග්‍යා මුස්ලිම් ජනයා ඉලක්ක කෙරෙමින් එරට ක්‍රියාත්මකවන ආරක්ෂක හමුදා මෙහෙයුම් "වාර්ගික ශුද්ධයකට නිදසුනක්" බව එක්සත් ජාතීන්ගේ මානව හිමිකම් ප්‍රධානියා පවසයි.

"කෘර හමුදා මෙහෙයුම" අවසන් කරන ලෙස මානව හිමිකම් ප්‍රධානී සෙයිඩ් රාද් අල් - හුසේන් ම්යන්මාර ආණ්ඩුවෙන් ඉල්ලා සිටී.

පසුගිය මාසයේදී රඛයින් ප්‍රාන්තයේ ප්‍රචණ්ඩ ක්‍රියා හටගැනීමත් සමග රෝහින්ග්‍යා මුස්ලිම් පවුල් 294,000 ක් පමණ අසල්වැසි බංග්ලාදේශ් වෙත පළා ගියහ.

රෝහින්ග්‍යා සන්නද්ධ පිරිස්වල ප්‍රහාරවලට තමන් ප්‍රතිචාර දක්වන බව පවසන මියන්මාර හමුදාව තමන් සිවිල් ජනයා ඉලක්ක කරන බවට නැගෙන චෝදනා ප්‍රතික්ෂේප කරයි.

 

අගෝස්තු 25 වෙනිදා රෝහින්ග්‍යා සන්නද්ධ පිරිස් පොලිස් මුරපොලවලට පහරදී ආරක්ෂක අංශ සාමාජිකයින් 12 දෙනෙකු ඝාතනය කිරීමත් සමග ප්‍රචණ්ඩ ක්‍රියා ඇරඹිණි.

එතැන් සිට මියන්මාරයෙන් පළා ගිය රෝහින්ග්‍ය ජනයා පැවසුවේ ගම්මාන ගිනිබත් කරමින්, පහර දෙමින් හා සිවිල් ජනයා මරාදමමින් හමුදාව කෘර ලෙස ප්‍රතිචාර දැක්වූ බවය.

ප්‍රහාර පිටුපස සිටින රෝහින්ග්‍යා මුස්ලිම් කණ්ඩායම කුමක්ද?

 

මොකක්ද මේ රෝහින්ග්‍යා අර්බුදය?

 

රෝහින්ග්‍යා ප්‍රජාව බංග්ලාදේශයේ සිට සිය රට වෙත සංක්‍රමණය වී ඇති බව පවසන මියන්මාර ආණ්ඩුව ඔවුන්ට පුරවැසිභාවය ලබා ගැනීම වළකා ඇත.

නමුත් පරම්පරා ගණනාවක සිට තමන් මියන්මාරයේ වෙසෙන බව රෝහින්ග්‍යා ප්‍රජාව පවසයි. 2012 වසරේ රඛයින් ප්‍රාන්තයේ හට ගත් ගැටුම් හමුවේ සිය ගම්බිම් හැර යාමට සිදු වූ රෝහින්ග්‍යා වැසියන් බොහෝ දෙනෙක් තාවකාලික කඳවුරු තුළ දිවි ගෙවති.

මියන්මාරයේ දුගී ප්‍රාන්තවලින් එකක් වන රඛයින් ප්‍රාන්තයේ දිවි ගෙවන ඔවුහු රැකියා ලබා ගැනීමේ දී දුෂ්කරතාවලට මුහුණ දෙති.

2016 වසරේ හට ගත් ප්‍රචණ්ඩ ක්‍රියා හමුවේ ආණ්ඩුවේ හමුදා විසින් ස්ත්‍රී දූෂණ, ඝාතන, ගම්මාන ගිනි තැබීම සහ වධහිංසා පමුණුවන ලද බවට රෝහින්ග්‍යා වැසියෝ චෝදනා කළහ.

මියන්මාර ආණ්ඩුව එම චෝදනා ප්‍රතික්ෂේප කරයි.

Read 15 times Last modified on Tuesday, 12 September 2017 23:45

Leave a comment

Make sure you enter the (*) required information where indicated. HTML code is not allowed.