ඉදින් එතැන් පටන් ඇරඹි ඒ සුවඳ පොද එකින් එක ගෙන ජීවිතයේ අරුත් පහදන්නට එළඹියේ කෙසේද කියන්නට මා උත්සුක වෙමි. එවැනි එක් දිනයක් නොව දින ගණනාවක් සිහිපත් වුවත් එකින් එක පෙළගස්වනුයේ කෙසේද යන්න මට  ගැටළුවකි. ඒත් නිමේෂකයකදී වුව අමතක නොවන මතකයන් ජීවිතයෙන් ඈත් කරනුයේ කෙසේද ?

මීට හරියටම වසරකට පෙර මම ඒ මතක සුවඳ හඹා ගියෙමි.ඒ නිහඬ බිමෙහි පය තැබුවෙමි.ඔවුන් තුරුළෙහි සිටි ළදැරිය නික්ම ගිය පසු සියළු දෑ නැවතී ඇති සැටියෙකි .ඒ බිම තව දුරටත් ජීවමාන නොවුණි.ඒ පසට,ගහ කොළට හුස්මක් නොතිබිණි ."රෝස පාට මල්"ගස කපා දමා බොහෝ කලක් ඉක්ම ගොසිණි .අසල්වැසියන් රොක්වූයේ මගේ ආගමනය අදහනු නොහැකි වූ නිසාවෙනි.